Abubuwan Mamaki Game Da Suratul Bakara Da Kamata Mu Sani (Kashi Na Uku)
Labarin 'Bakar' Shanu da Darasinsa. A nan za mu yi bayani kan yadda surar ta sami suna, labarin shanu da Allah Ya kawo a cikin ta, da darussan da musulmi za su iya ɗauka daga wannan tarihi.
Part 3: Sunan Sura da Ma’anarsa
1. Asalin Sunan “Al-Baqara”
Kalmar “Al-Baqara” a larabci tana nufin saniya (shanu mace). Wannan suna ya fito daga wani labari da aka kawo a cikin wannan sura, a cikin ayoyi 67 zuwa 73, inda Allah Ya umarci Bani Isra’ila su yanka wata saniya domin su gano gaskiyar wani kisan kai da aka aikata a cikinsu.
Wannan labari ya zama abin tunawa sosai saboda irin taurin kai da jayayya da Bani Isra’ila suka yi, duk da cewa umarnin Allah yana da sauƙi. A maimakon su yarda su yi aikin nan da sauƙi, sai suka rika tambayoyi da ƙarin sharudda, wanda a ƙarshe ya sa aikin ya zama da wuya a kansu. Wannan shi ne dalilin da ya sa surar ta sami suna Al-Baqara.
2. Bayanin Labarin Bakar Shanu
Allah Ya ce a cikin Al-Baqara:
“Kuma (ku tuna) lokacin da Musa ya ce wa mutanensa: Lalle Allah Yana umartar ku da ku yanka saniya. Suka ce: Shin kana yin dariya da mu? Ya ce: Na tuba ga Allah in kasance daga jahilai.” (Al-Baqara: 67)
A nan ne labarin ya fara. Annabi Musa (A.S) ya sanar da mutanensa – Bani Isra’ila – cewa Allah Ya umurce su da yanka wani saniya. Amma saboda rashin biyayya, sai suka yi masa tambaya da shakku: “Shin kana wasa da mu?”
Musa ya amsa da cewa shi bai taɓa yin wasa da kalaman Allah ba.
3. Tambayoyin Bani Isra’ila
A maimakon su yi biyayya nan take, sai Bani Isra’ila suka yi ta tambayoyi:
1. Wacce irin saniya ce?
Musa ya ce: Allah Ya ce kada ta zama tsohuwa ko ƙaramar saniya, sai dai matsakaiciya.
2. Launinta fa?
Musa ya ce: Allah Ya ce ita ce saniya mai launin rawaya mai haske wadda take burgewa ga masu kallo.
3. Siffar ta yaya?
Musa ya ce: Ita ce saniya wadda ba a taɓa amfani da ita wajen noman ƙasa ko jawo ruwa ba, ba ta da lahani, kuma ba ta da wata aibi.
A ƙarshe sai suka ce: “Yanzu ka bayyana mana gaskiya.” Sannan suka je da wuya suka samo irin wannan saniya mai tsada, suka yanka ta.
4. Dalilin Umarnin Allah
Dalilin wannan umarni shi ne akwai wani kisan kai da aka yi a cikin Bani Isra’ila. An kashe wani mutum, sai aka yi ta jayayya kan wanda ya kashe shi. Don warware wannan rikici, Allah Ya umurce su su yanka saniya sannan a buge gawar da wani sashi na wannan saniya. Da aka yi haka, sai mutumin da aka kashe ya tashi da izinin Allah ya nuna wanda ya kashe shi, sannan ya sake mutuwa. Wannan ya tabbatar da adalcin Allah da ikonSa akan rayuwa da mutuwa.
Allah Ya ce:
“Sai Muka ce: Ku bugi shi da wani ɓangare daga gare ta. Haka Allah Yake raya matattu, kuma Yana nuna muku ayoyinsa, domin ku yi hankali.” (Al-Baqara: 73)
5. Darussan da ke cikin Labarin
1. Sauƙin Umarnin Allah
Allah ya ba da umarni mai sauƙi: su yanka wani saniya kawai. Amma saboda jayayya, sai ya zama da wuya. Wannan darasi ne ga musulmi cewa idan Allah ko ManzonSa sun umurce mu da wani abu, ya kamata mu yi biyayya cikin sauƙi.
2. Illar Jayayya da Tambayoyin banza
Bani Isra’ila sun yi ta tambaya da jayayya har suka jawo wahala a kansu. Wannan gargadi ne ga musulmi su guji yawan tambayoyin banza kan shari’a, su yi biyayya da umarni.
3. Ikon Allah wajen Raya Matattu
Allah ya nuna mu’ujiza ta hanyar raya mamaci na ɗan lokaci domin ya bayyana gaskiya. Wannan dalili ne na tabbatar da cewa Allah shi ne Mai rai da mutuwa.
4. Ƙarfafa Adalci
Labarin ya nuna cewa Allah ba Ya barin kisan kai ya tafi a banza. Ya bayyana gaskiya don adalci ya tabbata.
5. Darasi kan Rikon Amana
Bani Isra’ila sun saba da rashin gaskiya da karya. Amma wannan al’amari ya nuna cewa Allah ba Ya barin gaskiya ta ɓoye.
6. Sunan Surar a Matsayin Darasi
Sunan “Al-Baqara” ya kasance alamar tunatarwa ga musulmi cewa kada su zama irin halayen Bani Isra’ila:
Taƙama da jayayya,
Ƙin bin umarnin Allah cikin sauƙi,
Rashin godiya ga ni’imar Ubangiji.
Musulmi ya kamata ya yi biyayya cikin sauƙi idan Allah Ya umarce shi da wani abu, domin sauƙaƙe umarni yana kawo albarka, amma jayayya tana kawo wahala.
7. Qarshen ta Part 3
Saboda haka, an kira wannan sura da suna “Al-Baqara” saboda wannan labarin saniya wanda ya zama alamar halayen Bani Isra’ila da darasi ga musulmi. Sunan ya riƙa tuna mana cewa sauƙin biyayya ga Allah shi ne alheri, yayin da taurin kai da jayayya sukan jawo wahala da asara.
✍️ Nuhu Saad Kumurya
.jpeg)
